Page 68 - allegorie
P. 68
M'ha' cchiànciri...
Quannu moru,
m'ha' cchiànciri tri gghiorna e tri notti:
a chiantu ruttu o a 'ssuppaviddanu
- e senza chi sai pirchì!
'Un ti vegnu
nè frati nè ziu:
'n'amicu affittusu, un parenti luntanu,
...quasi nenti: «chiddu d'i ciclamini»!
Unu chi ti vitti crìsciri
-senza cuvàriti
e sempri ti vardàu comu fussi 'na soru
crisciuta 'nta 'nn'àutra casa;
unu a ccui piacìa ( e piaci!)
sèntiti parlari,
vardàriti l'occhi,
vìriti rrìriri...
...Ma, allura, ...chi cc'entra,
pirchì 'sta chianciuta?
-Va' cerca! Va' scava e scurfunìa
'nto sangu d'i nanni,
'nte storii
e 'nte vicenni d'i nostri vecchi!
...E 'ntantu,
p'un ti pigghiari a strasattu,
vogghiu vardàriti ora,
mentri chianci comu fussi pi prova...
118
