Page 80 - ambiente
P. 80
'Nte cas'i campagna,
'nte pinnati, 'nte pagghiara, 'nte malasena
- unni quattro cantuna -
fannu risettu e villiggiatura-
picciriddi scàusi o nuri,
c'a facci lorda di 'na simana di ficu,
ficurinnia, cèusi, morvu e funciàti,
nèscinu abbrazzàti
c'un cani o 'n'agneddu o un palummu.
Un carrettu.
'Na scecca c'u putru panticciu
scasàta a nirvati di 'n mezzu l'ortu...
(Ali'arba, chi ciàuru e frischizza
'i pàmpini du finocchiu
'i cimi d'a brucculata
'i tinnarum'i cucuzza
'i civa d'a 'nzalata mascalora!) .
...Paraddisu,... Paraddisu
è l'ortu p'u sceccu!
... - Mmaliritta! -
'Na motocicletta
mi sfascia e sdirrupa tuttu 'stu settèmmiru
abbrumatu di lustru,
maliusu d'arrassu,
udurusu
di pan'i furmentu appena sfurnatu...
AURELIO • Favignana, 1937
266
