Page 110 - allegorie

Sciloccu

C'u rinocchiu chi scrusci e ti scunsenti
iri satannu mura è 'na pazzia:
ma ti senti picciottu ('n fantasia!)
e vai trippiannu comu fussi nenti.

'U sciloccu friscusu asciuca 'i renti;
pèrsiru 'i cucuzzeddi ciuri e llia;
'u cani s'avvantaggia: 'un criri a nenti,
t'aspetta a' utata e si cacariddìa.

'N'àjula 'mparsamata ti talìa
di supr'ò 'n muru: spari e mancu 'u senti:
a' terza botta mparpa... e finarmenti
ti varda e, a volu lentu, si canzìa.
...Bianchiàru i siminati tempu nenti...
...Cuntrura a gran scupuna nni Turrenti.

AURELIO - Favignana, maggio 1960

160