Page 97 - allegorie
P. 97
Sanàli e bucàli... *
Havi chi cci camìu di 'sta staciuni!
...Ritunni, macchitteddu, lattarìna,
'uredd'e pisci frischi... Stamatina,
a ccunti fatti he persu quattru luni!
'Na murina c'un mussu..., un cozzu chinu,...
ti ricu, frati meu, 'na testa tanta!
e certi tocchi, vah, chi si m'agguanta,
mi scantu chi struppedda 'u bullintinu!
Ma sempri a ppanza china, binirìca!
Pìzzica e sputa, 'n punta di furchetta:
affaccia, rriri, mi talìa, si strica,
ma appena calu 'u morsu,... s'a sfiletta!
- Murina vecchia?! - Eh, certu 'unn'è nnunnata!
Ma 'u piscaturi 'unn'è... babbalucedda
si s'ha frinatu tutta 'a staciunata
di 'nfriscinalla a ppostu d'irvicedda...
Cci rissi 'u surci a' nuci... E cci calài
un bullintinu 'ncuttunatu russu,
a pprov'ae cernia; l'ancurai 'nt'ò 'n mussu
- senza ràricci smannu - e cci anniscài
'na ranfa 'e purpu faèddaru, ... mitràru
- un mors'i mastru, stùriu d'occhiu e manu -
chi, pi ll'onuri, s'unn'ammucca 'n sanu,
cci lassa 'a rintatura... o 'u angulàru!
• a scelta, per estrazione; e secondo fortuna
147
