Page 66 - ambiente

Sciluccata

Arsura, purvirazzu strati-strati:
'n campagna 'na minnitta a trarimentu
chi scòtula ficari e siminati;
bìfari 'n terra, spichi di furmentu....

Fuscuri 'n celu - gianni; nivulati
chi sciàmanu 'n putiri d'ogni ventu;
marusu, acqui ntall'aria, rufuliati....
Un piscaturi- chi s'arreggi a stentu-

travagghia, sgammittatu, pi ssarvari
varcuzzi, armiggi, nassi... e puru chiddu
chi fu lassatu 'n terra d'i lampari.

Vigghianti 'nta so' naca, un picciriddu,
talìa la matri asciutta, 'nsalanuta:
aspetta chi lu pigghia e chi l'aiuta.

Lu ventu trantulìa finestri e porti
e scasa un firriggaru ch'era lentu:
...addini e gatti su' scantati morti;
tra puci e muschi, un cani 'unn'havi abbentu....

VITO - Palermo, 13 giugno 1956

252