Page 32 - ambiente
P. 32
Fora,
un miùpiru paisanu
- chi fa ùmmira, ciàuru e friscu,-
un fil'i girsuminu
arrampicàtu 'n facci a mezzjornu;
dui tri per'i ficurinnia,
'na ficara austina
-e attornu,
sparsi,
macchi d'ervi d'a muntagna.
Frunt'ò paisi,
'na Maronna a maruna di Valenza:
'ncannulata e ch'i vrazza ò celu,
longa e grossa quant'un saracinu.
Sbuzzati c'a martiddina,
s'affaccianu
un liuni affunciatu 'nto sirili di l'àstracu,
un cani braccu
un gattu sarvaggiu
'n'agneddu
(tutti 'n petra di Sutt'ò Passu)
aggiuccàti o affacciàti
'ntall'orri du pagghiaru
e 'nte crafocchi supr'ae attalori.
A ogni ziffa,
a ogni scrùsciu
s'arrùspigghianu tutti:
firrìanu l'occhi, circànnusi,
si vàrdanu e rrìrinu...
218
